काठमाडौं । प्रधानमन्त्री पुष्पकमल दाहालले तत्काल सत्ता समीकरण फेरबदल नहुने जनाएका छन् ।
नेकपा माओवादी केन्द्रको पार्टी कार्यालयमा बिहीबार सञ्चारकर्मीसँग कुरा गर्दै प्रधानमन्त्री दाहालले राष्ट्रिय स्वतन्त्र पार्टीले सरकारलाई दिएको समर्थन फिर्ता नलिने जनाए । रास्वपाको पनि केन्द्रीय समिति बैठक बसिरहेको हुँदा अब के होला भन्ने पत्रकारको जवाफमा उनले रास्वपा बाहिरिए केही नहुने भन्दै विश्वस्त देखिए । उनले भने, ‘केही हुँदैन । समर्थन पनि फिर्ता लिनुहुँदैन ।’
‘राजनीतिक समीकरण फेरबदल हुँदैन । राष्ट्रिय स्वतन्त्र पार्टीले सरकारलाई दिएको समर्थन फिर्ता लिनुहुँदैन मैले बुझेसम्म, बाहिर निस्कने निर्णय गर्दैन,’ उनले भने ।
बाहिर आएजस्तो राजनीतिक समीकरण फेरबदल नहुने भन्दै पत्रकारसामु प्रधानमन्त्री दाहालले प्रस्ट्याउने प्रयास गरे । माओवादीको बिहीबार बस्ने भनिएको पार्टीको स्थायी समितिको बैठक शुक्रबारका लागि सरेको छ ।
