काठमाडौ । नेपाली कांग्रेसका केन्द्रीय सदस्य डा.शेखर कोइरालालाई पार्टीको वरिष्ठ नेताका रुपमा सभापति शेरबहादुर देउवाले स्वीकार गरेका छन् । २०७८ पुसमा कांग्रेसको चौधौं महाधिवेशनमा देउवा र कोइरालाबीच नेतृत्वका लागि निर्णायक प्रतिष्पर्धा भएको थियो । ४० प्रतिशतभन्दा बढी मत ल्याएर निकटतम प्रतिस्पर्धी बनेका कोइरालालाई केन्द्रीय समितिमा पूर्व पदाधिकारीहरु भन्दा पछाडिको वरियतामा राखिएको थियो । कोइराला नेतृत्वको इतर समूहले भने उनलाई तत्कालीन वरिष्ठ नेता रामचन्द्र पौडेलपछिको वरियता दिन माग गर्दै आएको थियो । इतर समूहका कार्यक्रमहरुमा उपसभापति धनराज गुरुङ र महामन्त्री गगन थापाले समेत कोइरालालाई वरिष्ठ नेताका रुपमा सम्मान गर्दै आफूभन्दा अगाडि आसन र पछाडि भाषणको प्रबन्ध गर्ने गरेका थिए । यसपटक भने सभापति देउवा प्रमुख अतिथि रहेको कार्यक्रममा विशिष्ट अतिथिका रुपमा कोइरालाले सम्बोधन गरेका छन् ।
चितवनमा शुक्रबार सुरु भएको डेमोक्रेटिक लयर्स एसोसिएसनको महाधिवेशनको उद्घाटनका लागि सभापति देउवा र वरिष्ठ नेता कोइराला एकै जहाजमा भरतपुर पुगेका थिए । उद्घाटन समारोहमा कोइरालालाई विशिष्ट अतिथिको रुपमा आसन र भाषण गराइएको थियो । कांग्रेसको आन्तरिक राजनीतिमा यसको खास अर्थ रहने नेताहरु बताउँछन् ।
“निकटतम प्रतिस्पर्धीलाई दोस्रो वरियता र वरिष्ठ नेताको उपाधि दिने कांग्रेसको प्रचलन हो । बीचमा केही अलमल रह्यो होला, तर अब शेखर दाई नै पार्टीको वरिष्ठ नेता हो”, शेखरनिकट एक नेताले भने । ती नेताका अनुसार कोइरालालाई शीर्ष औपचारिक रुपमा शीर्ष वरियता दिन देउवा सकरात्मक छन् । आगामि केन्द्रीय समिति बैठकमा रामचन्द्र पौडेल राष्ट्रपति भएपछि रिक्त वरिष्ठ नेताको उपमा शेखरलाई दिने सम्भावना रहेको बताइन्छ । यसअघि संस्थापन इतर समूहले वरिष्ठ नेताको सम्मान दिएपनि संस्थापन पक्षका नेता कार्यकर्ताहरु सन्तुष्ट थिएनन् । सभापति देउवाले नै पार्टीभित्र डा.शखेर कोइरालाको उपस्थिति र वरियतालाई स्वीकार गरेपछि अब समस्या नहुने बताइन्छ । सभापति देउवा र वरिष्ठ नेता कोइराला भक्तपुर कांग्रेसको जिल्ला सम्मेलनमा पनि एकै मञ्चमा देखा पर्दैछन् ।
स्मरण रहोस् तत्कालीन सभापति सुशिल कोइरालाले पनि आफूसँगै पराजित देउवालाई पार्टीको वरिष्ठ नेताको उपाधि र दोस्रो वरियता दिएका थिए ।
