ताविल अन्सारी सुनसरी । नेपाल सरकारले रोक लगाएको सुनसरीको इज्तेमा कार्यक्रम फुकुवाका लागि सुनसरीबाट काठमाण्डौ गएका मुस्लिम अगुवा नेताहरुले पहल थालेका छन् । मुस्लिम समुदायको विशुद्ध धार्मिक कार्यक्रम सुचारु गराउनका लागि मुस्लिम अगुवा नेताहरुले राजनितिक भेटवार्ता गरेर पहल थालेको हो । हरिनगर गाउँपालिका सुनसरीका अध्यक्ष हाजी गफार मियाँ अन्सारीको अध्यक्षतामा रहेको सो प्रतिनिधि मण्डलले नेपाल काँग्रेसका सभापति तथा पूर्व प्रधानमन्त्रि शेर बहादुर देउवालाई भेटेर धार्र्मिक कार्यक्रम इज्तेमा सुचारु गराउन पहल गर्न अनुरोध गरेका छन् । सभापति देउवाले यो धार्मिक कार्यक्रम रहेकाले कुनै पनि बहानामा रोक्न नहुने बताउँदै प्रधानमन्त्रि प्रचण्डसँग कुरा गर्ने आश्वासन दिएको प्रतिनिधि मण्डलमा सहभागि नेपाली काँग्रेसका युवा नेता ,महाधिवेशन प्रतिनिधि डा. अबुल हुसैन अन्सारीले बताउनु भएको छ । यसै गरि मुस्लिम आयोगका अध्यक्ष समिम मियाँ अन्सारीसँग पनि भेटेर पहलका लागि अनुरोध गरेका छन् । अध्यक्ष समिम मियाँ अन्सारीले पनि धार्मिक कार्यक्रम संचालनका लागि नेपाल सरकारसँग पहल गर्ने आश्वासन दिएका छन् ।प्रतिनिधि मण्डलमा सुनसरीका मुस्लिम अगुवा नेताहरु कोशी प्रदेश साँसद हाजी इसराइल मन्सुरी , हरिनगर गाउँपालिकाका अध्यक्ष गफार अन्सारी , कोशी गाउँपालिकाका अध्यक्ष अयुब अन्सारी , नेपाली काँग्रेसका नेताद्धय डा. अबुल हुसेन अन्सारी , हाजी अब्दुल मियाँ राइन , मेहदी हसन , नेकपाएमालेका नेता तैयब मियाँ राइन रहेका छन् ।
