काठमाडौं । मन्त्री र उच्चपदस्थ कर्मचारीको विदेश भ्रमणमा कडाइ गरिएको छ । मङ्गलबार बसेको मन्त्रिपरिषद् बैठकले यस्तो निर्णय गरेको हो ।
मन्त्रिपरिषद् बैठकका निर्णय बुधबार सार्वजनिक गर्दै सरकारकी प्रवक्ता एवम् सञ्चार तथा सूचना प्रविधिमन्त्री रेखा शर्माले भ्रमणमा कडाइ गर्ने निर्णय भएको बताउनुभयो । सरकारले नेपाल सरकारका मन्त्री र अन्य उच्चपदस्थ कर्मचारीलाई अब उप्रान्त अति आवश्यक अवस्थामा बाहेक वैदेशिक भ्रमण नगर्न भनेको छ ।
यस्तै, सरकारले पूर्व मुख्यसचिव लीलामणि पौड्यालको संयोजकत्वमा गठित उच्चस्तरीय तलब सुविधा आयोगको प्रतिवेदन कार्यान्वयनका लागि प्रधानमन्त्री तथा मन्त्रिपरिषद्को कार्यालयका सचिवको संयोजकत्वमा कार्यान्वयन सहजीकरण समिति गठन गर्ने निर्णय गरेको छ ।
