काठमाडौं । त्रिभुवन विमानस्थल भन्सार कार्यालयका ३ जना कर्मचारी निलम्बनमा परेका छन् ।
हङकङबाट क्याथे एयरवेजको जहाजबाट आएको ब्रेकशुमा लुकाएर ल्याएको ठूलो परिमाणको अन्दाजी ८० देखि १०० किलो सुन भन्सार जाँच पास भएर निस्किएको देखिएपछि ३ जनालाई निलम्बन गरिएको हो ।
कर्मचारीको कमजोरी देखिएकाले निलम्बन गरिएको भन्सार विभागको भनाइ छ । भन्सार अधिकृत सन्तोष चन्द, खरिददार कुमार ढकाल र सरोज श्रेष्ठ निलम्बनमा परेका हुन् । ब्रेक शु आउँदा भन्सार कार्यालयका कर्मचारी सरोज श्रेष्ठको ड्युटी एक्सरे मेसिनमा हेर्ने थियो । तर, उनको लापरवाहीले उक्त सुन भित्रिएको स्रोतले बतायो ।
शंकास्पद सामान आएको थाहा पाएर पनि उनले थप प्रक्रिया नपर्याएको बताइएको छ । रेडी प्रालिले आठ वटा ब्रेक शुका बक्स ल्याएको थियो । जसमध्ये पाँच वटा बक्सलाई हेर्न भनेर लेखेको पाइएको थियो । उनी टेलिफोन अपरेटर हुन् । उनले एक्सरे हेर्नेसम्बन्धी तालिम लिएका व्यक्ति हुन् ।
यस्तै, खरिददार कुमार ढकालले ब्रेक शुको बक्स खोलेर हेरेको देखिन्छ । तर, पनि उनले सुन देखेनन् । त्यस्तै, भन्सार अधिकृत सन्तोष चन्द भने उक्त सामान भएको ठाउँमै नपुगेको भन्सार विभागले जनाएको छ ।
